CHIEF MINISTER-IN NGAIZAWLAH KHAWDO KUT HMANPUI

Chief Minister Pu Lalduhoma chuan nimin khan Ngaizawl khawtlangin Khawdo Kut an buatsaih chu khuallian niin a hmanpui a. Bialtu MLA Er. H. Ginzalala, Adviser to CM chu khualzahawm a ni.

Thusawiin Chief Minister chuan, khawtlang mipuiten hlim taka min lo mikhual avangin a hahdamthlak ka ti hle a ni, tiin Kut chibai a buk a. Mizo hnam peng hrang hrangte Kut leh ze tha tinrengte chu Mizo hnam thil pawimawh an ni vek a. A theih ang angin kan humhalh zel tur a ni, a ti.

Khawdo Kut hi lawmthusawina Kut a nih angin tun hnaia Ngaizawl khawtlangin hmasawnna thar a hmuh thenkhat a tarlang.

Ngaizawl hi kum 1927 ah Burma atanga rawn tla thla Paite hnamten Tualpui lal ram chhungah, khatihlaia Tualpui lal Thanherhna phalnaa an din a ni a. A hnuah lal Thanherha fapa naupang zawk Khenchhuma chuan a awpzui ta a ni. Rambuai lai khan Khawzawlah khawm an ni a. Nimahsela, Jhum Permit hmangin Ngaizawlah hian Bawk an khawh zui zel a. Chuvang chuan 1927 atanga vawiin thlengin mei a mit lo tia sawi theih a ni.

Tunah hian in 205 an ni mek a, mihring 1200 vel an cheng a ni.