EDUCATION MINISTER DR. VANLALTHLANA’N STATE EDUCATION MINISTERS CONCLAVE A HMANPUI, KAR KHATAH NI KHAT HOME LANGUAGE DAY LEH HINDI SPEAKING DAY ATANA RUAHMAN A NIH THU A SAWI.
Education Minister Dr. Vanlalthlana chuan nimin (July ni 23, 2026 ningani) khan Department of School Education & Literacy (DoSEL), Union Ministry of Education buatsaih, ni hnih chhung awh "Two-Day Conclave of State/UT Education Ministers on Review of Centrally Sponsored Schemes" New Delhi-a neih mek chu a hmanpui in heng thte hi a sawi a; Mizoram zirna tihhmasawnna tura hmalakna lian zual leh hmachhawp pawimawh tak tak a awm thu a sawi a. NEP 2020 zulzuiin Secondary leh Higher Secondary zirlai-te tan Science leh Mathematics textbook-te chu Mizo leh Sap ṭawng inkawpa siam a nih tawh thu leh, kar khatah ni khat Home Language Day leh Hindi Speaking Day atana ruahman a nih thu a sawi a. Khawpui leh thingtlang zirna inthlauhna sut kian nan SAfES (Standardized Assessment for Elementary Schools) hmanga state puma common question system hman ṭan a nih thu a sawi bawk.
Minister chuan a taka mipuiin a rah an hmuh tur zingah PM POSHAN hnuaia cook-te hlawh chu State contribution a leta tihpun a nih thu a sawi a. School calendar pawh Northeast ram dangte angin January aṭanga December session-ah thlak a ni a, school tihchangtlun leh thuam ṭhat hna chu chak zawka a kal theih nan State PWD kuta hlan vek a ni, a ti.
Education Minister chuan zirtirtute leh school dinhmun endikna atan Vidya Samiksha Kendra (VSK) portal-ah sawrkar school thlalak leh project hna upload a nih thu sawiin, Mizoram chuan Performance Grading Index (PGI)-ah hma a sawn chhoh mek thu a sawi a. Samagra Shiksha kum hmasa budget 51% chauh hman a nih chhan chu Central-in SNA aṭanga SPARSH system-a inthlak avang leh RBI leh Ministry timing inmil loh avang a nih vang a nih thu sawiin, Central aṭanga sum dawn ṭhinte chu ṭha taka hman zel a nih tur thu a sawi bawk.
He inhmuh khawmah hian DoSEL hnuaia Centrally Sponsored Scheme (CSS) pahnih, Samagra Shiksha leh PM POSHAN chungchanga hmalakna leh hmathlirte sawi ho a ni. Minister hi Pu K. Lalthawmmawia, Commissioner & Secretary, School Education Department leh Pu C. Lalthanzira, State Project Director, Samagra Shiksha leh official dangten an ṭawiawm a ni.
