Hmanlai thil sawi reng loin insiamthat ngaihna laiah kan in siamthat a tul - MNF MLA
Mizoram hmun dang te rualin Thenzawlah pawh Serchhip West Block MNF huaihawt in vawiin (June ni 30) khan Vantawng Group YMA Run, Thenzawl Bazar Vengah Remna Ni ropui taka hman a ni.
Serchhip West Block MNF huaihawt, Thenzawla Remna Ni hmanna ah hian MLA Er. H.Lalzirliana chuan khuallian niin a hmanpui a, Dr. Vanlaltanpuia Ex- MLA leh MNF General Hqrs hruaitu thenkhat ten an tawiawm a ni.
Pu Liantluanga Renthlei, Serchhip West Block MNF President kaihhruai Remna Ni lawmna inkhawmah hian Pu R.Lalbiakmawia Ex-MNA leh Pu F.Rohmingthanga Ex-MNA ten thusawi in Mizoramin Remna leh muanna an neih theihna tura MNF hnathawh hrang hrang an tarlang a, Thenzawla Block MNF hruaitu - Pu Laltlanzuala, Pu Lalengkima, Pu K.Lallianchhunga ten report an pe bawk.
Khuallian Pu H.Lalzirliana MLA chuan "Remna kum 40 kanlo neih hnuah Nationalism kan hriatthiam dan alo danglam tawh a ni mai thei. Nationalism hi Hnam alo pianchhuah in alo awm ringawt lova, India sawrkar in nasa taka min hrual avangin Mizo rilru na avanga rawn piang a ni, a ti a. India ram chu kum 2047-ah develop country nih tumin hma ala mek a, chutiang chiah chuan keini Mizoram pawh ngaihtuahna thar nen Nationalism kan her rem a hun a, a neitu MNF te hian hmanlai thil sawi reng lova kan kalpui a hun" a ti. "MNF sawrkar lohna chhan pawh mipui te duhkhawp kan tling zo lova, ZPM an enchhin a, chutihrual chuan tuna sawrkarna chang mek te pawh an in sawi ang em em an ni bik lova, mipui te hian bihchiang sela phun luai luaina tham thil an ti tawh" tiin Er. Lalzirliana chuan ngaihtuahna thar seng chho zel tur leh in siamthat ngaihna laia in siam thaa tunlai mila in her rem thiam turin kalkhawm party mipui te a fuih a ni.
Hnam anga movement kan neih chu tunlai hian sawi dal tuma theihtawp a bei an awm thin tiin Er. H.Lalzirliana chuan "Hnam Movement hi lo awmlo sela tuna kan dinhmun ang hi kan ding phak a ngem? Mizo te khawvel hmuha min pho chhuak tu chu he kan hnam movement hi a ni a, a neitu Mizo mipui te hian i hlut thiam ang u, a ti bawk.
Ex-MLA Dr. Vanlaltanpuia pawhin thu sawiin "Politics ah khelh dan tawk leh in kher dan tawk hriat a tul hle a, mi tam takin an nunna hlu tak an chan phahna movement sawi sawp a, engmah lo anga in chhuahsak ringawt chu a fel lo hle a ni" a ti a.
"Hnam anga kan mualphona a tam tawh em em a, ruihhlo in min run mek a, zirna ah kan thleng sang thei tawh lo. Kan hnam hi a tluchhe mek a ni" Dr. Vanlaltanpuia chuan a ti a. Mizoram hian bungthar a kai theihna turin tunlai milin Hnam Movement kan her rem a tul a, kan hnam hian chhantu a mamawh leh mek tawh a, MNF party chu Mizoram tan politics thar din turin tan la ila, kan ram damna turin ngaihtuahna thar i pu u, ati bawk.