KAN SORKAR HNUAH HIAN HNA RENG RENG HI FAIR TAKIN KAN LA ZEL A, TUTEN EMAW AN DUHSAK ZAWNG AN THUN LUI THIN ANG KHA TUNAH CHUAN A AWM VE TAWHLO. - Chief Minister
70th Batch of Police Constable passing out Parade chu nimin (18-7-2026. Saturday) khan Police Training School Thenzawl ah neih niin Chief Minister Pu Lalduhoman khuallian niin a hmanpui.
Chief Minister Pu Lalduhoma chuan Police thar 275 te leh an nu leh pate a lawmpui thu sawiin, hmeichhe police thar 26 te lawmpuina hlan bawkin Mizoram sorkar chuan in za vaiin kan lo lawm che u a ni a ti a, kan sorkar hnuah hian hna reng reng hi fair takin kan zel a, tuten emaw an duhsak zawng an thun lui thin ang kha tunah chuan a awm ve tawh lo a ti.
Tun hma khan fair-lo taka sorkar hna lak a lo tam thin avangin kan thalai tam takte an beidawng a. Thawhrimin awmzia a nei lo niin an hria a, sorkar an ring zo lo va. Sorkarin hna a lak dawnin, “A fair dawn lo” niin an ngaisa ringawt thin. Nimahsela, tunah chuan Equality for All principle chu a takin kan kalpui a, sorkar hnaa lut turin sawipuitu tha neih a ngai tawh lo va. Thawhrimna leh taihmakna zawk kha sawipuitu tha ber an lo ni ta a. Competitive exam beitu kan thalaite pawh an hlim a, sorkarah rinna an nei thar a, sorkar hi mipuite ta a nihzia a parchhuak leh mek a ni a ti.
Vawiina kan hmaa ding kan Police thar 275 te pawh hi, duhsak bikna emaw, sawipuitu Minister leh Politician tel lo va, intihsiakna fair tak kaltlanga tlingte an nih thu sawiin, Hnathawktu Qualify-te hian kan ram tan Quality Service min pe ang tih hi kan ring a. Nangni pawh hi chutianga hna rawn thawk tur chuan kan beisei zui dawn che u a ni a ti bawk.
Chief Minister chuan Police tha nei ramah khawtlang nun a ralmuang thin tih sawiin, kan nitin nunah harsatna emaw buaina a lo thlen changin Police-te hi kan vauchher a. Dan bawhchhetute an hmachhawn a, rukruk hmang te, ruihhlo zuar te, khawtlang duh loh zawnga chet chingte an bitum zel a. Engkimah kan aiawhin a hmatawngah an ding thin. Ram leh khawtlang hmel lanna an ni tiin Police nungchang tha leh service tha chuan ram leh hnam hmel an timawi a, mipuite min thlamuan a, sorkarah lungawina min pe a. Police inthlahdahte, nungchang mawi lo te, thamna lak ching ten min tiralti a, dan hmanga rorelna min rinhlelhtir a, ram an tihmingchhe thin tih a sawi bawk.
Training tha tak an neih theih nan hian Police Training School chu nasa taka thuam that anih thu sawiin Digital Laboratory te, Gymnasium te, Fire Arm Simulator te leh thil dang dang kan dah thar a. PTS tihchangtlun hi vantlang himna atana investment tangkai tak niah kan ngaih avangin phur takin tih changtlung a nih thu a sawi.
Police tihhmasawn hna hi chu la kalpui zui zel anih tur thu a sawi a, sualna lo chhuak thar zelte hmachhawn thei tur leh misualte hmakhalha kal zat zat thei tura thuam chak an duh tih sawi.
Tun hnaiah pawh in mamawh em em lirthei 219 zet kan lei thar a, tin, equipment thar, Smart Policing Equipment te, Forensic Equipment te pawh kan lei thar a. Sum leh pai kan neih ang zia zelin kan police-te thuam chak hna hi kan la kalpui zel dawn a ni a ti.
A sawi zelna ah Pu Lalduhoma chuan Police hna kan thawhna kawngah, dan bawhchhetute kan chhuina kawngah, misual kan chhuichhuahten hremna an hmuhna tura hma kan lakna kawngah tu mitmei mah rawn veng suh u tiin, Dik takin thawk ula, dan hi lal rawh se a ti a, Rorelna dik a awm theihna kawngah police-ten mawhphurhna sang tak in chelh a, dan humhimtu (Guardian of the Law) leh hnehchhiahna tuartute chhanhimtu (Protectors of the vulnerable) in ni tih hi vawng reng ang che u a ti a, an ropui vang emaw an san vangin emaw tumah in ngaihhnathiam a thiang lo va. An retheih leh an pachhiat vangin tumah in hlamchhiah thiang hek lo. Dan hmaa mi zawng zawng hi angkhat vek kan ni a ti.
Nunna thapa mite chhanhim hna an thawh thin avangin Police te hian ngaihsan an hlawh thin a. Thlei bik nei lo va mi zawng zawng chunga ang khata dan an lekkawh thin avangin mi tinin an zah thin. In uniform hian chu mawhphurhna chu a pe che u a ni tiin an hnathawhna kawngah taksa hriselna ngai pawimawh turin a chah bawk.
Police training chhuak te chu rinawm tak, huaisen tak, inngaitlawm tak sia ram dan kengkawhtu, khua leh tui, mahnia inveng thei lote venghimtu ni turin a chah a, an thawhsak mipuite rin hlawh khawpa hna thawk turin a chah.
Nimina 70th Batch of Police Constable passing out Parade hi Home Minister Pu K. Sapdanga, Pu Lalchhandama Ralte MLA/Leader of Opposition, DGP Sharad Agarwal leh Police hotu hrang hrang ten an hmanpui a, Training chhunga tithate hnenah medal leh running trophy sem nghal niin a dawngte chu :
-Governor of Mizoram Running Trophy & Gold Medal (All Round Best): Constable No. 193 F. Lalngaihzuala
-Chief Minister Running Trophy & Gold Medal (Proficiency in Drill): Constable No. 189 H. Lalremruata
-Home Minister Running Trophy & Gold Medal (Proficiency in Legal Studies): W/Constable No. 254 Vanlalawmpuii
-DGP (M) Running Trophy & Gold Medal (Proficiency in General Studies): Constable No. 199 Tluangzathanga Jahau
-Addl. DGP Running Trophy & Gold Medal (Proficiency in Weapon): Constable No. 161 K. Lalhmangaihzuala
-IGP (Hqrs.) Running Trophy & Gold Medal (Proficiency in Physical Training): Constable No. 201 Zirnunsanga
-DIG (Training) Running Trophy & Gold Medal (Proficiency in Shooting): Constable No. 101 Richard J. Lalthanmawia
-Principal, PTS Running Trophy & Gold Medal (Exemplary Conduct): Constable No. 193 F. Lalngaihzuala
70th Batch recruit Constable Basic Training te hi an vaiin mi 275 an ni a, mipa 249 leh hmeichhia 26 an ni a, August ni 25 2025 ah training turin PTS ah hian an lut a ni.