May ni 18 atanga July ni 16, 2026 chhunga puanthui (Basic Tailoring Class) zirchhuak mi 16 te hnenah vawiin khan Certificate hlan an ni.

Handloom Design Training-cum-Production Centre, Thenzawla Certificate Distribution neihah hian Dr. Lalngura Tlau, Director LAD chuan khuallian niin hun a hmang a. Thusawiin Dr. Lalngura chuan Rashtriya Gram Swaraj Abhiyan (RGSA) scheme hnuaiah Bilkhawthlirah kuhva kawr atanga Dispo siamna te, Tuipui D ah Home Stay siam te leh Thenzawlah Handloom Design Training-cum-Production Centre te din a ni a, Bilkhawthlir leh Tuipui D chu VC te kutah hlan a ni tawh a, Thenzawl pawh tuna training zawh atang hian a hmunhma enkawl leh buaipui ngai zawng zawng te buaipui turin VC te kutah hlan a ni ang, a ti.

Thenzawl chu puantahna hmunpui a nih avangin Handloom Design Training Centre chu Self Help Group te leh VC ten sum thawhchhuah nan hmang tangkai thiam turin LAD director chuan a chah a. Eizawnna tlak thiamna nei tura mi 16 ten Basic Tailoring Class an zirchhuak chu lawmawm a tih thu a sawi bawk.

Thenzawla Handloom Design Training-cum-Production Centre hi kum 2023 khan hawn a ni a, kumin February thla khan Handloom design Training neih niin tun tum a vawi hnihnaah hian puantui design zir a ni thung.