"Mizoten Pathian thilthlawn pek kan neih zingah chuan YMA hi a ropui ber te zinga mi a ni" Prof. Malsawmliana, General Secretary CYMA
He thu hi vawiin (July 17, 2026) a YMA Thenzawl Venghlun Branch Silver Jubilee khuallian nia a hmanpui na ah sawiin, Mizoten Pathian thilthlawn pek kan neih zingah chuan YMA hi a ropui ber te zinga mi a ni a ti a, YMA hi kan Society ah awmlo ta se eng angin nge he hnam hi a kal ang?, NGO tha tak tak kan nei a, naupang atanga kum upa thleng, hmeichhia leh mipa kan tel vek theihna, min phuarkhawm tu chu YMA hi a ni a ti.
Prof. Malsawmliana chuan kan chhiat kan thata kan lamchhuah ber, kan hmahruaitu leh kan hnung dawltu, kan lungngaihna min hnemtu, chhiat kan tawha min kan a, kan lawmni a min lawmpui tu chu YMA hi a ni a, YMA hi awmlo ta se kan society hian kal ngaihna a hrelo maithei, society min pumkhat tu leh himna min thlentu chu YMA hi a ni a, kan hnam tan YMA hi kan chawinun zel a, kan tih vul zel a pawimawh a ni a ti a. YMA chu tanpui ngaite tanpuitu kan nih angin kan dinchhan bulpui ber tanpui ngaite tanpui, chanhai riangvaite puitu kan nihna lai hi langsar ber zel rawh se a ti bawk.
Hnamdang Nupui pasal neilo tura nasa zawka inzirtir a pawimawh thu sawiin, kan hnam than zelna turin nupui pasal la neilo te chu mahni hnam pui ngei nei turin a sawm a ni.
Ruihhlo do chungchang sawi bawkin Ruihhlo in nasa takin min ei chhe mek a, thalai tam takin an thih phah a, chhungkaw tam takin hlimni hmel hmu lovin an rum mek a, Ruihhlo do kawngah kan zavai a kan thawho a ngai a ni tiin, chhungkaw tin in mawhphurhna an neih chu Ruihhlo la ti ve chhin lo te venhim a ni a ti a, kan thalai ruihhlo do tura ke penchhuak te lo tawngtaipui thin turin a sawm bawk.
Jubilee lawm tura kalkhawmte duhsakna a hlan a, Silver Jubilee an hman chu rahbi thar an kaina nise a duh thu sawiin, khawtlang inrelbawlna, inlungrualna leh thawhona tha zawk siamtu lo ni se tiin duhsakna a hlan a ni.
YMA Thenzawl Venghlun Branch Silver Jubilee lawmna hi vawiin khan Thenzawl Auditorium ah neih niin Pu Lalchhuanliana, President in a kaihruai a, Pu C. Lalnunthara, President, Vantawng Group YMA chuan Khualzahawm niin a hmanpui a, tlai ah khawtlang huap in ruai theh a ni bawk.