"State pawn atanga Mizoram lo tlawhtuten min fak thinna langsar chu faina leh thianghlimna a ni" Pu Lalduhoma Chief Minister.
Formaosa Foundation chuan vawiin khan Joint YMA Thenzawl hnenah bawlhhlawh paihna lirthei an pe a, he hun hi Chief Minister Pu Lalduhoman khuallian niin a hmanpui.
Lirthei inhlanna hun hi Joint YMA Hall, Bazar Veng Thenzawla neih ah Chief Minister chuan thu sawiin Mizorama khualzin lo kalten min fak thinna langsar tak mai chu khawi hmun pawh a lo thianghlim viau zel hi a ni tiin, Faina leh thianghlimna hian kan ram leh hnam a chawimawi mek tih a sawi a, vawiin ah Thawnzawl khua in bawlhhlawh paihna lirthei tha tak Formosa Foundation kaltlanga an nei tur chu a lawmpui thu a sawi a, Thenzawl khua chu India ram huapa Mizoram khaw lar ber zinga mi a nih mek thute, a hmunhma a remin a nuam a, khualzin pawhin an hre tawh hle a, tlawhtu pawh in ngah tial tial a, khaw dang zawng zawng aia in lo fai bikte pawh hi a tul a; Chu mi hre chung chuan Formosa Foundation pawhin he lirthei hi an rawn pe che u a ni a ti.
Mizoram tlawhtu an pung zel a, Thenzawl khua chu Tourism hmunpui ni tura ruahman a nih vangin mikhual an thleng hnem ber dawn a, mikhualte thlenna tur leh kan nunphung min hmuhpui a kan ei in ang te an lo tawnhriat ve theih nan Home Stay pawh siam belh a nih dawn thute sawiin, mikhual lo thleng tura theihtawp lo chhuah turin VC, NGO, Kohhran, khawtlang leh pawl hrang hrang hruaitute a sawm a, a bul tanna chu faina a nih thu sawiin bawlhhlawh paihna tha tak an neih thar chu tangkai taka hmang turin a chah bawk.
Baryl Vanneihsangi MLA pawhin he hun hi hmanpuiin thu a sawi a, Faina hi hriselna, engkim neihna a ni tiin bawlhhlawh tha taka sawngbawl a pawimawh zia a sawi a, faina chu kan zawhawmna ani tiin Thenzawl chuan Mizoram lo tlawhtu khualzin an thleng zel dawn a, khawtlang fai chuan zahawmna keng tel ani tiin, hemi kawnga Bialtu MLA hova hma an la chu fakawm a tih thu a sawi.
Bawlhhlawh paihna lirthei inhlanna hi Pu Lalmuanpuia, President Joint YMA Thenzawl in a kaihruai a, Pu Samuel Lalrinpuia Vantawng Group YMA Secretary in inlawmna thu a sawi a, Pu Jonathan Lalremruata, Chairman, Formosa Foundation-in thu sawiin, Clinton Sherwood, Legal Advisor Formosa Foundation kaihruaina in lirthei inhlanna hun hman a ni bawk.